شوية اقتصاد

شوية اقتصاد

بداية بتوع انت مش عاجبك حاجة ليهم مكان مخصوص ورا مصنع الكراسي.

لما بنتكلم ع دولة ف اختيار غلط اوسخ كتير من عدم فعل اي شئ.

المصلحة العامة مش بالضرورة مصلحة اللي بيحكم.

اي نظام اقتصادي بيقوم باخد ثروة الغني الشريف نظام فاشل التأميم فكرة غبية. الاشتراكية فكرة اغبى و التنويعات بتاعتها متفرقش كتير.

دور الدولة ف الاقتصاد هو انها تكون عامل حفاز زي ف الكيميا يدخل التفاعل عشان يسرعه بس ميتفاعلش. الحكومات افشل من انها تدير اقتصاد او تشارك ف ادارته.

بالكتير تراقبه و تتخل وقت الحاجة فقط.

طيب ايه المشكلة و حصلت ازاي

النظام الاقتصادي زي صندوق مقفول فيه كل حاجة لما بتنتقل الثروة من حد لحد بتفضل جواه تلف ع و مع الكل.

لكن..

لما يحصل ادخار او انفاق ع الرفاهيات فبكده الثروة بتخرج فعليا من الصندوق ده و بالتالي بتقل الكفائة.

مثلا لما واحد يبني قصر و يستورد له سجاد احمر من فرنسا اكيد ده اصول لن تستغل و لن تفيد.

لو ف ادارة فاشلة للبلد فالكل بيحاول يلم فلوسه و يخرج او يشوف هتوص لايه و بالتالي الاقتصاد هيقع و الكفائة ف النازل.

طيب لو اعتبرنا الاقتصاد صندوق مقفول هو محتاج اد ايه عشان يشتغل بكفائة .. سؤال صعب اجابته بدقة اكيد

لكن محتاج ارادة سياسية و شعبية و ثقة و فلوس بتتحرك جواه مع الكل.

طيب الدولة هتعمل ايه؟

المفروض ان عندها ناس بتقيس الكفائة دي او بتشوف ايه اللي بيقللها (لاحظ اني كاتب ده صعب حالا) فلو اللي بيحصل ادخار للفلوس فاولى بالدولة تطرح مشروعات تعيد الفلوس دي للسوق بعيد عن اديها.

تجبر البنوك انها تقلل الفايدة (مش باناقش حرام ولا حلال بس مجرد تخزين الفلوس ف بنك عمل غبي حتى لو ف حساب جاري بدون فوايد) و كمان تشارك ف مشروعات (تدعم شركات او تعمل شركات).

غلط الدولة انها تعتبر نفسها تاجر عايز يكسب عشان يسد ديونه.

الدولة تجبي ضرايب من نشاطات شغالة و زيادتها ع المدى البعيد بيزود موارد الدولة.

الوضع الاحتكاري للدولة بدعوى الدعم مسخرة بنت وسخة. الدولة لو مفيش رقابة عليها هتكون اوسخ من المحتكر من القطاع الخاص.

الدعم حق يراد به باطل .. اسكت احنا بنأكلك اوسخ اكل

اسكت احنا بنعاجك ف مستشفيات محتاجة كل حاجة

اسكت احنا بنحميك.. و الجيش بيعمل نوادي و فنادي و جبنة.

الدولة تاجر فاشل و مجرد استمرارها ف ده قتل للاقتصاد نفسه.

برضه من حق الدولة توزد مواردها بس تشوف طرق تحمي الاقتصاد.

بعض القطاعات الحكومية بيكون عندها فائض انتاج وقتها تبيعه مش تتوسع ف الانتاج الكبير.

...

الاغنياء ف الغرب بيتبرعوا بجزء من ثرواتهم عشان العجلة تدور اكتر و يكسبوا اكتر و برضه يؤدوا واجبهم لمجتمعاتهم.

هنري فورد كان مقتنع ان العامل بتاعه لازم يتظبط عشان يظبط الانتاج فعمل ثروة و سمعة طيبة.

لما هنتكلم من وجهة نظر اسلامية (حسب فهمي الشخصي) الفلوس المركونة غلط و لازم تتحرك و تشتغل و تشغل ناس و الا تكون بترتكب حرام.. ده تصور منطقي و صحيح لحماية الاقتصاد و الحفاظ ع السلام الاجتماعي.

فائض المال لازم يرجع يدور و لا يخزن.

...

المجتمع نفسه لازم يصلح مشاكله بطرق كتير زي ان الحكومة توجه الانفاق ف مكانه الصحيح مش سجاد احمر و موتوسيكلات.

ف حالة عجز الحكومة يقوم المجتمع عبر جمعيات او جهات غير حكومية بمساعدة المتضررين من اي مشاكل.

...

اخيرا الحكومات لها مصالح ليست بالضرورة ف صالح الشعب لكن ف صالحها و استمرارها لذلك استعباط الحكومة ف جعل بقائها اولوية قصوى بداية دمار للمجتمع ككل.

مشاريع وهمية مش هتخليها تكمل و هتسحق الكل ..

برضه نفاق الشعب هيساعد ع التدمير الذاتي.

...

الاقتصاد اهم من ان تديره الدولة