حب القاهرة موجودة جوة قلبنا كلنا ..... صحيح مش باين لانه متعفر بترابها او مش باين ورا دخان عربيتها بس هو موجود . القاهرة مش كوبري قصر النيل ولا الكورنيش و لا شوارع وسط البلد و لا ميدان التحرير و ايس كريم العبد و محلات 26 يوليو ولا حتي المترو القديم اللي بيجبها من اولها لاخرها ولا حتي مسجد الفتح ولا البياعين اللي قدامه ولا مولاتها ولا سيمتها اللي محدش بيتخلها غير ف المواسم ولا حتي الجزيرة اللي فيها الاوبرا و الساقية و الاهلي و البرج كمان ... القاهرة مش ماسبيروا اللي هو اكبر اريال ف العالم مع الاعتزار لبيرسيل و اوكسي البامبي ... القاهرة مش محافظة واحدة دي 3 في 1 ... القاهرة مش جرايد طابعة اولي الساعة 10 بالليل ولا اتوبيسات مفيهاش مكان لرجل ولا تاكسيات عفا عليها الزمن ولا شوارع زحمة
القاهرة زي ماهي روكسي هي برضو المطرية و الحلمية .... القاهرة يتقاطع فيها عمر بن الخطاب مع ابو بكر الصديق
القاهرة الجامعة اللي باسمها ف الجيزة !. و الجامعة اللي ف قلبها اسمها عين شمس رغم انها ف العباسية
اطول شوارعها اسمه صلاح سالم ... و تبوس ايدك لو طلعت منه سالم
القاهرة كان فيها تاني سكة حديد ف العالم و انظف مدينة سنة 1928
القاهرة بنقول عليها مصر و هي العاصمة
القاهرة واحدة و ليها 13 نسخة ف اميركا لوحدها .. بس الاصل اوحش من الصورة
القاهرة هي احنا بكل تصرفتنا و ثورتنا و اخرلقنا و ضحكنا و حزننا .... كم مرة قرأت ان مرافقها ستنهار خلال سنوات قليلة و حتي الان لاتزال تقاوم حتي الزمن بمباني وسط البلد الرائعة .... انظر لتلك المباني الرائعة التي بناها فنان و ليس مجرد مهندس .. القصر العيني .. عمارات ش رمسيس .. مصر الجديدة .. مجلس الشعب ... انها قطعة جنة تاهت ف وسط التلوث البصري و السمعي
القاهرة لها سحر خاص لا يقاوم .... انها ليست البدر و لكنها قمر
ليست الشمس و لكن يدور حولها الكواكب
القاهرة ليست ف هدوء مطروح ولا حيوية اسكندرية و لا طبيعة سيناء ولا جو اسوان
القاهرة قلب مصر النابض ... لا ترها اكتر من شئ قاتم اللون لكنها الجزء الزي لا يمكن الحياة دونه
القاهرة ضمير مصر الحاضر اذا صلحت صلح باقي مصر
انها حياة ربما نراها ناقصة كثير و لكنها تملك القدرة ع التعايش
كما قلت لصديقة قاهرية : سحر القاهرة غير اسكندرية
القاهرة عاملة زي صديق صريح اوي لدرجة تخليكي تخافي منه بس متقدريش تستغني عنه ابدا
انا بحب القاهرة ... جملة اعتراضية او خبرية او تعجبية او استنكارية او حتي تسخربها من القاهرة لكن برضو جملة صحيحة
ليست هناك تعليقات:
إرسال تعليق