all about lenovo a3000 tab

بداية الكلام هنا للناس اللي اول مرة تشتري تاب او اول مرة تشيل اي حاجة اندرويد فمش هندخل ف تفاصيل مكلكعة قدر الامكان .. فياريت نقرأ للاخر و منكسلش و الكلام بالعربي يعني مش هتقعد تترجم و تتعب من اللغة.. في حاجات مش هتفهمها اكيد متجربش غير و انت عارف هتعمل ايه و تسأل اكتر من مرة جايز انت فهمت حاجة غير المكتوبة و جايز انا اللي سرحت.

انا مش شغال مستورد و لا في الشركة فمش هتفرق معايا انك تشتري او تبيع التاب .. فقبل ما ترمي اي مشاكل ع اي حد تأكد انك غطيت الموضوع كويس.

يالنسبة للاخوة السامسونجيين اكتر من سامسونج و الاسوسين اكتر من اسوس .. الكلام مش ليكم اشتري اللي انت متعود عليه و متقرفناش :) زي ما قلت انا مش هاستفيد حاجة من حضرتك.

نصيحة مهمة اوي متجربش حاجة بالسمع افهم قبل ما تجرب او تغير حاجة انت مش عارف هي ايه دي.

بالنسبة للاخوة من خارج القاهرة هتلاقي المحلات بتنصب عليك ف التاب و كمالياته فاتعب نفسك و انزل اشتريه من القاهرة او لو عندك مكان معتمد زي فودافون او راية او كمبيوتر شوب اشتريه منهم كده هيكون اوفر ليك.

لينوفو كأي شركة فيها منتجات كويسة و منتجات زبالة فمش معنى ان التاب عجبك ان الباقين حلوين. بالعكس انت لازم تجرب و تسأل و تفهم.

متشتريش موديل 60030 اللي بيدخل نت بس حتى لو ببلاش.

اي كان السبب متخلعش الكارت او شريحة الاتصال و التاب شغال اقفله الاول و اتأكد انه اتقفل.

في سؤال مهم لنفسك انت عايز تاب ولا موبيل .. لو معاك موبيل للاتصال بس و التاب للنت ماشي لكن التاب لوحده بس هيكون شيله عليك و الحجم (عموما لاي تاب) بيخليه سهل الخبط و محتاج عناية .. لو ميزانيتك تسمح هات موبيل 6 بوصة او 5.5 بوصة هيكون عملي اكتر.

اشتري جراب و اسكرينة له.

نصيحة مني متحولش تزايد عليه دي تجارب مستخدم للتاب مش خبير ف تابات لينوفو .. يعني اي معلومة هنا مسئوليتك انت انك تتأكد منها.

........

تاب لينوفو a3000  عملي جدا و مناسب للناس اللي مهملة الى حدا ما ف الحفاظ ع التاب او الموبيل. (سيتم تحديث المدونة كل ما نلاقي مشكلة او حاجة لازم تتكتب). 

تحذير اي معلومة مكتوبة راعينا قدر الامكان التأكد منها لكن اي ضرر يحدث نتيجة عدم الفهم او حتى اتباعها يقع على مسئولية حضرتك الشحصية و يرجى التأكد مسبقا قبل اي تعديل تنوي تنفيذه منعا لاي اضرار لا نتمنى حدوثها.

مواصفاته

شاشة 7 بوصة ips و معالج رباعي 1.2 و مساحة داخلية 16 جيجا متاح منهم حوالي 13 جيجا (رقم تقريبي) و الرام 1 جيجا و بينزل بخط او خطين (كلمنا كله عن نسخة الخطين اللي بتتصل بدون رووت) و الكاميرا الخلفية 5 ميجا و الامامية 0.3 ميجا الاندوريد 4.2 ...

لمعلومات تفصيلية ادخل صفحة التاب a3000 ع موقع لينوفو او ادخل صفحتة ع gsmarena  .

المميزات

• عملي
• سعر مناسب
• كل اكسسواراته متوفرة
• سهل الصيانة (برة التوكيل طبعا).
• خطين (معظم التابات خط واحد).

العيوب

• التاب نزل موديلين الاول 60030 و مكنش فيه اتصال لازم رووت الاول.
• احيانا لو البطارية وصلت زيرو مش بيفتح (موديل 60030).
• الكاميرا مش حلوة اوي كخمسة ميجا.
• مفيش تديث اندرويد كيت كات لحد دلوقت و مفيش كلام عن نزوله.
• الوزن كبير مقارنة بباقي تابات لينوفو.
• مفيش سماعة معاه بتنزل (زي معظم الشركات).

لو قابلتك مشكلة ادخل ع منتدى لينوفو اكيد حد اتكلم عنها او صفحة gsmarena اللي فوق هتلاقي ناس كاتبة عنها صعب تلاقي مشكلة جديدة.


ابرز المشاكل

• مبيشحنش كويس: غالبا (لا يمكن استخدام لغة قاطعة لاني مش قاعد جنبك او شغال ف الشركة دي تجارب بانقلها لحضرتك) بيكون الشاحن نفسه باظ لاي سبب (الكهربا مشاكلها كتير و احيانا الفيشة اللي انت موصل ديما فيها مشكلة) او سلك الشاحن يكون بايظ (رغم ده ممكن يكون شغال ف النقل كويس) او مجرد قفل و فتح التاب هيحل المشكلة .. بعض موديلات 60030 مبيشحنش كويس الا لو كان مقفول.
• مش راضي يحمل تطبيق: لازم نفرق بين حاجتين الاولى التطبيق فعلا مدعم ع التاب و التانية هو بدأ تحميل و وقف ف النص .. التانية اللي اقصدها و دي حلها انك تقفل تطبيق التحميل من شريط التنبيهات اضغط ع التاب بتاع التحميل ضغطة طويلة لحد ما تلاقي app info ظهرت اضغط عليها و اعمل force stop  و ارجع حمل تاني. تأكد بردو ان الشبكة كويسة او wifi شغال. 
• التاب تقيل: و كمان مفيش مساحة ... نزل برنامج تنضيف زي كلين ماستر و شوف الفرق .. تأكد ان في مساحة فاضية عليه.
• البطارية بتخلص بسرعة: اولا ده مش نوكيا 3310 يعني اخره يوم معاك. تشغيل النت و تطبيقات و خلافه بيخلص البطارية بسرعة .. اقفل النت لو مش محتاجه و البلوتوث و قلل اضائة الشاشة للحد المناسب لعينك (انا منزله لاخر درجة) .. قدر الامكان متشحنش كل شوية اصبر لحد ما يكون 20% و اشحن (حسي ظروفك) .. اشحن بالشاحن الاصلي او شاحن بين (1.5 - 2.0) ميلي امبير .. طبعا اشتري شاحن محترم و وصلة محترمة.
•  هنج: افتح الغطا و بص يمين هتلاقي دايرة صغيرة بعد الشريحتين اضغط عليها كام ثانية بحنية و هتلاقيه اشتغل. بردو جرب زرار البور مع زرار تعلية الصوت بس مش الكل بيعرف يضغطهم ف نفس الوقت .. الفكرة تضغط ف نفس اللحظة مش تدوس اوي عليهم.

• التحديث: مش هيفرق معاك .. كل ما ف الامر ان جوجل عايزة لوجو الاندرويد يظهر ع كل جهاز يشتغل به و اجبرت الشركات ع ده. طبعا لسه مفيش كيت كات رسمي.
• ازاي اعمل برنت سكرين: اضغط زرار البور و زرار توطية الصوت معا
• الكمبيوتر مش شايف التاب: ممكن تكون الوصلة بايظة او اعدادات الusb مش مظبوطة. شوف لما توصله هيطلع ايه ف شريط التنبيهات هتلاقي اختيارات شوف هو مختار شحن بس ولا ايه.
• عايز اغير الخطوط بتاعة التاب .. نزل لانشر بيغير خطوط الوجهة و كده لكن الخطوط جوه التطبيقات محتاجة رووت متفكرش دلوقتي تعمل ده طلما لسه جديد ...
• عملت ريست و البرامج اللي عندي عايزها تاني .. ادخل ع سوق جوجل و روح على my app هتلاقي التطبيقات كلها في تاني تاب.
• الكاميرا مقلوبة (الامامية) و انت جوه التطبيقات .. اتحلت المشكلة بعد التحديث.

شوف بعض الصفحات المفيدة

http://forums.lenovo.com/t5/Introduction/tkbc-p/Intro

التحديث الرسمي

http://support.lenovo.com/us/en/products/tablets/a-series/a3000-tablet

دعم المنتج
http://support.lenovo.com/eg/ar/products/tablets/a-series/a3000-tablet